Um viðburðinn

Það verða ljúfir tónar sem fylla Eldborgarsal Hörpu í júlí í sumar þar sem Katie mun flytja öll sín bestu lög ásamt hljómsveit sinni en Katie er einhver vinsælasta söngkona Bretlands síðustu ár og hefur hún selt meira en 11 milljón plötur, haldið tónleika fyrir hundruðir þúsunda og hlotið 56 platínuplötur.

Þegar Katie, sem fæddist í Georgíu, skrifaði undir samning hjá Dramatico Records í september árið 2002 grunaði engan mann að við útgáfu þriðju plötu hennar, „Pictures“, væri hún orðin sú söngkona á breskri grundu sem nyti mestrar hylli um heim allan. Fyrstu tvær plötur hennar, „Call Off the Search“ og „Piece By Piece“ náðu báðar fyrsta sæti í mörgum löndum. Ferill hennar hefur verið ævintýri líkastur og m.a. hefur henni hlotnast sá heiður að spila með uppáhaldshljómsveit sinni, Queen, fyrir Nelson Mandela og einnig hefur hún spilað fyrir og snætt kvöldverð með Elísabetu drottningu í Buckinghamhöll.

Einstök og stórbrotin rödd Katie Melua, full af þroska og dýpt sem hefur þroskast síðasta áratug, flytur okkur söngva um ástina og lífið.

Umsjón: Tónleikur ehf