Um viðburðinn

Söngvaskáld á Suðurnesjum - Rúnar Júlíusson
Berg 6. febrúar kl. 20:00

Hr. Rokk verður í aðalhlutverki á fyrstu tónleikum tónleikaraðarinnar Söngvaskáld á Suðurnesjum sem áfram verður haldið í Hljómahöll í byrjun árs, þriðja árið í röð. Rúnar Júlíusson náði að uppfylla alla helstu drauma unglingspilta en hann var í vinsælustu rokkhljómsveit landsins, besta fótboltaliðinu og auk þess var fegursta stúlka Íslands kærasta hans. Það var vinur hans Gunnar Þórðarson sem kynnti hann fyrir bassanum og saman stofnuðu þeir fyrstu íslensku bítlahljómsveitina Hljóma. Fleiri fylgdu í kjölfarið og má þar nefna Ðe lonlí blú bojs, Áhöfnina á Halastjörnunni og Trúbrot en Rúnar átti einnig farsælan sólóferil og gekk sífellt í endurnýjun lífdaga eins og með hljómsveitinni GCD. Það þarf fólk eins og Rúnar fyrir fólk eins og okkur.

Flytjendur eru Dagný Gísladóttir, Arnór B. Vilbergsson og Elmar Þór Hauksson.

Söngvaskáld á Suðurnesjum - Magnús Kjartansson
Berg 1. mars kl. 20

Magnús Kjartansson, betur þekktur sem Maggi Kjartans, er fjölhæfur tónlistarmaður og hefur starfað með flestum stærstu hljómsveitum landsins og má þar nefna Óðmenn, Júdas, Trúbrot, Brunaliðið, HLH flokkinn svo fáeinar séu nefndar en hann er jafnframt leikinn textahöfundur auk þess sem hann hefur starfað sem upptökustjóri, útsetjari og lagahöfundur.

Segja má að ferill hans hafi hafist í drengjalúðrasveit Keflavíkur þar sem hann lék á trompet en eftir það var ekki aftur snúið. Hann fór á skólaball „and the rest is history“ eins og sagt er.

Flytjendur eru Dagný Gísladóttir, Arnór B. Vilbergsson og Elmar Þór Hauksson.

Söngvaskáld á Suðurnesjum - Söngvaskáld sem stöldruðu við
Berg 5. apríl kl. 20

Bjartmar var einn vinsælasti tónlistarmaðurinn á Íslandi á níunda áratugnum og sló í gegn þegar hann gaf út vinsælustu plötu sína Í fylgd með fullorðnum.

Þekktustu og vinsælustu lög Bjartmars eru vafalaust Týnda kynslóðin, Hippinn, 15 ára á föstu og járnkarlinn en Bjartmari hefur oft tekist að fanga tíðarandann í textum sínum. Hann skýtur gjarnan á aðra íslenska tónlistarmenn s.s. Bubba og Megas og er snillingur satírunnar og skopstælinga.

Að undanförnu höfum við fengið að heyra meira frá Bjartmari þar á meðal hina fallegu ballöðu: Þannig týnist tíminn í flutningi Ragnars Bjarnasonar og Lay Low.

Um þessar mundir kemur út ný plata með Bjartmari.

Flytjendur eru Dagný Gísladóttir, Arnór B. Vilbergsson og Elmar Þór Hauksson.