Um viðburðinn

Föstudagsröðin: Ástir og örlög - Sinfóníuhljómsveit Íslands
9. mar. » 18:00 Norðurljós | Harpa

HLJÓMSVEITARSTJÓRI
Yan Pascal Tortelier

EINSÖNGVARI
Þóra Einarsdóttir

PÍANÓLEIKARAR
Anna Guðný Guðmundsdóttir
Guðrún Dalía Salómonsdóttir

EFNISSKRÁ
Robert Schumann Þrír söngvar úr Myrthen
Robert Schumann Geistervariationen
Ludwig van Beethoven Sinfónía nr. 5, Örlagasinfónían

Fátt hefur verið tónskáldum þvílíkur innblástur gegnum aldirnar sem ástir þeirra og örlög. Á þessum tónleikum Sinfóníuhljómsveitar Íslands hljóma verk sem sprottin eru beint úr lífsreynslu tveggja tónskálda. Robert Schumann hreifst ungur af Clöru Wieck, dóttur píanókennara síns, og þegar þau fengu loks að ganga í hjónaband var sem flóðgátt hefði opnast í tónsköpun hans. Meðal ótal sönglaga sem hann samdi um þetta leyti var ljóðaflokkurinn Myrthen sem hefur að geyma ástarsöngva af ýmsum toga. Fjórtán árum síðar var Schumann við það að missa vitið, og síðasta píanóverk hans er tilbrigði um stef sem hann sagði að englar hefðu sungið fyrir sig. Í örvæntingu sinni fleygði hann sér í ána Rín en var dreginn á land. Næsta dag lauk hann við píanótilbrigðin sem síðan hafa verið kölluð „Andatilbrigðin“.

Þegar Beethoven samdi Örlagasinfóníu sína, árið 1808, ágerðist heyrnarleysi hans stöðugt og hann vissi að dagar hans sem fremsti píanóleikari Vínarborgar væru senn taldir. Hann tók örlögum sínum af æðruleysi en bauð þeim líka birginn. Vini sínum skrifaði hann: „Ég mun taka örlögin kverkataki, þeim mun ekki takast að knésetja mig!“ Örlagasinfónían er mögnuð tónsmíð, glíma í tónum sem lýkur með fullnaðarsigri. Um tónsprotann heldur aðalstjórnandi Sinfóníuhljómsveitar Íslands, Yan Pascal Tortelier.

Kynnar eru Oddný Halla Magnúsdóttir og Guðni Tómasson.